अनुभव र वैकल्पिक राजनीतिसँगै

राष्ट्रिय स्वतन्त्र पार्टी (रास्वपा) बाट सर्लाही प्रतिनिधिसभा निर्वाचन क्षेत्र नम्बर–४ मा नरेन्द्र साह कलवार उम्मेदवारका रूपमा देखिएका छन्। देशव्यापी रूपमा देखिएको रास्वपाको लहरले उनको उम्मेदवारीलाई थप ऊर्जा दिएको छ।

वि.सं. २०४२ सालमा सर्लाहीको बर्हथवा नगरपालिका–११, हिरापुरमा जन्मिएका कलवारले औपचारिक शिक्षा स्नातक तहसम्म अध्ययन गरेका छन्। शैक्षिक पृष्ठभूमि र लामो सामाजिक–राजनीतिक संलग्नतालाई उनले आफ्नो राजनीतिक यात्राको आधार बनाएका छन्।

वि.सं. २०६४ सालको पहिलो संविधानसभा निर्वाचनमा तत्कालीन महेन्द्र राय यादव नेतृत्वको तराई मधेस सद्भावना पार्टीबाट समानुपातिक उम्मेदवार भई निर्वाचित भएका कलवार त्यसपछि नेकपा (माओवादी केन्द्र) सँग आबद्ध भएका थिए। वि.सं. २०७४ सालको प्रतिनिधिसभा निर्वाचनमा उनी माओवादी केन्द्रबाट प्रत्यक्ष उम्मेदवार बनेका थिए।

स्थानीय रूपमा कलवारलाई शान्त, कम बोल्ने तर व्यवहारमा विश्वास गर्न सकिने अनुभवी नेताका रूपमा बुझिन्छ। भाषणभन्दा काम र स्थायित्वलाई प्राथमिकता दिने उनको शैली धेरै मतदाताका लागि भरपर्दो मानिन्छ।

स्थानीय तहमा राम्रो जनपकड भएका कलवार लामो राजनीतिक अनुभव बोकेका व्यक्ति हुन् । २०७४ को निर्वाचनमा केवल ७०० मतको अन्तरले पराजित भएका उनी जितको नजिक पुगेका उम्मेदवारका रूपमा समेत चिनिन्छन्।

सरल र विश्वासिलो छवि उनको मुख्य शक्ति भए पनि, कम बोल्ने स्वभावका कारण मिडिया उपस्थितिमा केही कमजोर देखिने टिप्पणी पनि हुने गरेको छ। साथै, नयाँ पार्टी भएकाले सांगठनिक विस्तार अझै चुनौतीपूर्ण हुन सक्ने अवस्था छ।

उम्मेदवारी दर्ता गर्दै उनले आफूलाई अनुभवी सामाजिक अभियन्ता तथा विकासमुखी नेतृत्वकर्ताका रूपमा प्रस्तुत गरेका छन्। सामाजिक सेवा, पर्यटन प्रवर्द्धन, मिडिया तथा रोजगारी सिर्जनाका क्षेत्रमा सक्रिय रहँदै आएका उनले सकारात्मक सोच, दृढ प्रतिबद्धता र परिणाममुखी कार्यशैलीलाई आफ्नो राजनीतिक पहिचानको आधार बनाएका छन्।

समाजका विभिन्न तहसँग प्रत्यक्ष रूपमा काम गरेको अनुभवका कारण स्थानीय आवश्यकता र प्राथमिकता राम्रोसँग बुझेको उनको दाबी छ। यही अनुभव र रास्वपाको वैकल्पिक राजनीतिक धारलाई साथमा लिएर उनी सर्लाही–४ मा जनमतको कसीमा उत्रिएका छन्।