दुई पटक समानुपातिक सांसद भइसकेकी प्रसाईं पहिलो पटक प्रत्यक्ष निर्वाचनमा प्रतिस्पर्धा गर्दैछिन् । उनको भिडन्त विघटित प्रतिनिधिसभाका सभामुख घिमिरे र उपसभामुख राना मगरसँग हुँदैछ ।
०००
नेपाली कांग्रेसकी नेतृ सरिता प्रसाईं पहिलो पटक प्रत्यक्ष उम्मेदवार बनेकी छन् । उनले झापा क्षेत्र नम्बर २ बाट कांग्रेसका तर्फबाट प्रतिनिधिसभामा उम्मेदवारी दिएकी हुन् ।
१० साउन २०२४ मा जन्मिएकी प्रसाईं कांग्रेसको भ्रातृ संस्था नेविसंघ र तरुणमा क्रियाशील भई पार्टी राजनीतिमा पुगेकी हुन् ।
पञ्चायतकालीन समय (२०३९ ) सालमा उनी नेविसंघमा आवद्द भएकी थिइन् । उनी २०६० सालमा तरुण दलको केन्द्रीय सदस्य बनिन् । मेची बहुमुखी क्याम्पसकी पूर्वविद्यार्थी प्रसाईंले स्नातक तहसम्मको अध्ययन गरेकी छन् ।
उनको संसदीय यात्रा २०७० सालबाट सुरु भएको हो । दोस्रो संविधानसभामा समानुपातिक सांसद रहेकी उनी २०७४ सालमा राष्ट्रिय सभा सदस्य बनिन् । त्यसबेला राष्ट्रिय सभामा कांग्रेसको प्रमुख सचेतक थिइन् ।
२०७४ सालमा उनी कृषि राज्यमन्त्री बनेकी थिइन् । उनी १३औं र १४औं महाधिवेशनबाट पार्टीको केन्द्रीय सदस्य बनेकी थिइन् ।
प्रसाईं २०७९ सालको निर्वाचनमा पुनः समानुपातिक सांसद बनेर दोस्रो पटक प्रतिनिधि सभामा पुगिन् । तत्कालीन समयमा पार्टी भित्र संस्थापनइतर समूहमा रहेकी उनले नेता डा. शेखर कोइराला पक्षबाट समानुपातिक सांसद बन्ने अवसर पाएकी थिइन् ।
झापास्थित बुद्धशान्ति गाउँपालिकाकी स्थायी बासिन्दा प्रसाईं अविवाहित हुन् । उनी झापा जिल्लाको पार्टी संरचनामा काम नगरी नै केन्द्रीय तहमा पुग्न सफल भएकी नेतृ हुन् ।
पहिलो पटक प्रत्यक्ष उम्मेदवार बनेकी प्रसाईं झापा-२ मा ‘हेभिवेट’ उम्मेदवारसँग प्रतिस्पर्धा गर्दैछिन् । विघटित प्रतिनिधिसभाका सभामुख र उपसभामुख उनका प्रतिस्पर्धी छन् ।
पूर्वसभामुख देवराज घिमिरे एमालेबाट, तत्कालीन उपसभामुख इन्दिरा राना मगर रास्वपाबाट, राष्ट्रिय प्रजातन्त्र पार्टी (राप्रपा) राप्रपाबाट भद्रप्रसाद नेपाल (स्वागत नेपाल) यही क्षेत्रका उम्मेदवार हुन् ।
नेकपाले यो क्षेत्रबाट संविधानसभा सदस्य धर्मशीला चापागाईंलाई उम्मेदवार बनाएको छ । प्रसाईंका लागि यस क्षेत्रमा १७ दलीय र ३ स्वतन्त्र गरी कूल २० जना प्रतिस्पर्धी छन् ।
झापा-२ मा अघिल्लो पटक आफ्नो उम्मेदवार नउठाएको कांग्रेस समानुपातिकमा तेस्रो शक्ति बनेको थियो । गठबन्धनबाट माओवादी केन्द्रका उम्मेदवार हरिकुमार राना मगरलाई कांग्रेसले समर्थन गर्दासमेत उनले तेस्रो स्थानको मत पाएका थिए ।
अघिल्लो संसदीय निर्वाचनको आधारमा प्रत्यक्ष समानुपातिक दुवैतर्फ यो क्षेत्रमा एमाले पहिलो दल हो । त्यसबेला एमालेका देवराज घिमिरेले २८ हजार ७१६, स्वतन्त्र उम्मेदवार भद्रप्रसाद नेपाल दोस्रो स्थानको मतसहित २६ हजार ४५५, माओवादी केन्द्रका हरिकुमार राना मगरले १३ हजार ९३०, रास्वपाका रुद्रप्रसाद गिरीले ८ हजार ७८१ मत ल्याएका थिए ।
एमालेको पक्षमा समानुपातिकमा २६ हजार ४९० मत खस्दा रास्वपाले दोस्रो स्थानको मत २२ हजार ५१७ प्राप्त गरेको थियो । कांग्रेसले समानुपातिकमा तेस्रो स्थानको मत १५ हजार ४९८ पाएको थियो ।
झापाका कांग्रेस नेता लोकराज ढकालका अनुसार पार्टी एक ढिक्का भएर नेता/कार्यकर्ता प्रसाईंको पक्षमा लागेका छन् ।
झापालाई खोक्रा भाषणले होइन, ठोस योजना र परिणामले अघि बढाउनुपर्ने चुनावी एजेन्डा लिएर कांग्रेस उम्मेदवार प्रसाईं चुनावी प्रचारमा छन् ।
उनी भन्छिन्, ‘हरेक घर, युवा र आम नागरिकका लागि देखिने र अनुभूति हुने काम चाहिएको छ । सही व्यक्ति, सही ठाउँमा हुनु जरुरी छ । हामीले नेतृत्व छान्दा नाम, हल्ला वा भावनामा होइन, काम गर्ने सोच र इमानदारी हेर्नुपर्छ । जसले समाज बुझ्छ, समस्या सुन्छ र समाधानका लागि मिहिनेत गर्छ ।’
