दुई हारपछि तेस्रो प्रयासमा जितको खोजी

२०७० सालको संविधानसभा निर्वाचन र २०७९ को प्रदेशसभा सदस्यमा पराजित केसी जनअनुमोदनका लागि तेस्रो पटक चुनावी मैदानमा होमिएका छन् ।

०००

नेकपा एमालेले बागलुङ क्षेत्र नम्बर १ बाट हिराबहादुर केसीलाई प्रतिनिधिसभा सदस्यको उम्मेदवार बनाएको छ ।

२०३२ सालमा बागलुङको काठेखोला गाउँपालिका-३ धम्जामा जन्मेका केसी विद्यार्थी राजनीतिबाट उदाएका नेता हुन् । २०५० देखि २०६० सम्म अनेरास्ववियुमा आवद्ध रही विद्यार्थी राजनीतिमा सक्रिय उनी बागलुङमा परिचित नाम हो ।

केसीले दुई कार्यकाल नेकपा एमाले बागलुङ जिल्ला अध्यक्षको जिम्मेवारीमा रहेर काम गरिसकेका छन् ।

विद्यार्थीको हक-अधिकार, वैज्ञानिक र गुणस्तरीय शिक्षाका लागि निरन्तर संघर्ष गर्दै आएका उनी २०५७ सालमा स्वतन्त्र विद्यार्थी युनियन, धौलागिरि बहुमुखी क्याम्पस बागलुङको सभापति बनेका थिए । विद्यार्थीबीच लोकप्रिय नेताका रूपमा उदाएका केसी जनताका बीचमा भने उपविजेताका रूपमै रहनुपरेको छ ।

२०७० सालको संविधानसभा निर्वाचन र २०७९ को गण्डकी प्रदेश सभा सदस्यमा पराजित केसीलाई पार्टीले विश्वास गरेर पटक-पटक टिकट दिँदै आएको छ ।

२०७० सालमा भएको संविधानसभा सदस्य निर्वाचनमा नेपाली कांग्रेसका हरि खड्का १३ हजार ५०० मत प्राप्त गरी निर्वाचित हुँदा एमालेका केसीले ११ हजार ९६३ मत ल्याएका थिए ।

यस्तै उनी २०७९ को गण्डकी प्रदेश सभा निर्वाचनमा नेपाली कांग्रेसकै दिपेन्द्रबहादुर थापा मगरसँग एक हजार ४८० मतान्तरले पराजित भएका थिए । थापाले १३ हजार ८९८ प्राप्त गरी विजयी हुँदा केसीले १२ हजार ४१८ मत प्राप्त गरेका थिए ।

दुई पटक चुनावी प्रतिस्पर्धामा पराजित केसी अहिले तेस्रो पटक चुनावी मैदानमा छन् । २०५० बाट विद्यार्थी राजनीतिबाट राजनीतिमा आएका उनी तेस्रो प्रयासमा अनुमोदन हुने प्रयासमा छन् ।

विद्यार्थी संगठनको जिल्ला, अञ्चल हुँदै केन्द्रीय कोषाध्यक्ष, युवा संघको केन्द्रीय उपाध्यक्ष, पार्टीको जिल्ला कमिटी सदस्य, उपाध्यक्ष हुँदै केसी दुई कार्यकाल एमाले जिल्ला अध्यक्ष भइसकेका छन् ।

देशलाई सही बाटोमा फर्काउने ऐतिहासिक अवसरका रूपमा निर्वाचनमा होमिएको उनले बताएका छन् । ‘फागुन २१ को चुनाव केवल जित्नका लागि मात्रै होइन, यो राष्ट्रिय पुनर्निर्माणको ऐतिहासिक अवसर हो,’ उनले भने ।

केसीले ४० भन्दा बढी विकसित तथा विकासोन्मुख देशहरूको भ्रमणमार्फत विकासका मोडेल, युवा नीति, सामाजिक संरचना र अवसर-चुनौतीको प्रत्यक्ष अनुभव लिने अवसर पाएका छन् । केन्द्रको राजनीतिक सम्भावनाभन्दा आफ्नै जिल्लाको माटो रोज्दै तीन दशकदेखि जनताको सुख-दुःखमा सँगै रहेको उनले बताएका छन् ।