चित्रबहादुर केसीको विरासत धान्न मैदानमा

२०३८ सालमा विद्यार्थी जीवनबाट राजनीतिक यात्रा सुरु गरेका कृष्ण अधिकारी पाका कम्युनिस्ट नेता चित्रबहादुर केसीको विरासत धान्न चुनावमा होमिएका छन् ।

०००

राष्ट्रिय जनमोर्चा (राजमो) ले विद्यार्थी राजनीतिबाट उदाएका नेता कृष्ण अधिकारीलाई बागलुङ क्षेत्र नम्बर १ बाट चुनावी मैदानमा उतारेको छ ।

बागलुङ–१२ निवासी अधिकारीले राजनीतिशास्त्र विषयमा स्नातकोत्तर अध्ययन पूरा गरेका छन् । उनी सामाजिक तथा राजनीतिक अभियन्तासमेत हुन् । विद्यार्थी जीवनदेखिनै संगठनात्मक गतिविधिमा आबद्ध रहँदै विभिन्न जिम्मेवारी सम्हालेको अनुभव अधिकारीसँग छ ।

२०३८ सालमा अखिल (छैटौं) का तर्फबाट त्रिभुवन माध्यमिक विद्यालय, पैयुँपाटाको स्ववियु सदस्य भएर राजनीतिमा आएका अधिकारी २०४० मा दक्षिण भेग एरिया अखिल (छैटौं) को प्रथम सचिव, २०४५ मा अखिल भारत नेपाली विद्यार्थी संघको केन्द्रीय महासचिव र २०४६ देखि २०४७ सम्म अखिल भारत नेपाली विद्यार्थी संघको केन्द्रीय अध्यक्ष रहेका थिए ।

उनले २०५० सालमा नेपाल राष्ट्रिय स्वतन्त्र विद्यार्थी युनियन (छैटौं) को केन्द्रीय कोषाध्यक्ष, २०५२ देखि २०६४ सालसम्म तीन कार्यकाल नेपाल राष्ट्रिय स्वतन्त्र विद्यार्थी युनियन (छैटौं) को केन्द्रीय अध्यक्ष रहेर काम गरे ।

उनी २०६७ सालमा राष्ट्रिय जनमोर्चाको केन्द्रीय सचिव हुँदै विभिन्न जिम्मेवारीसहित गण्डकी प्रदेश इन्चार्जको जिम्मेवारीमा रहेका थिए ।

अधिकारीसँग पाका नेता चित्रबहादुर केसीको निजी सचिवालयमा लामो समय काम गरेको अनुभव छ । केसीकै क्षेत्रमा राजमोका उम्मेदवार बनेका अधिकारीलाई उनै केसीको विरासत जोगाउने चुनौती छ ।

नेपालको गणतन्त्र प्राप्तिको आन्दोलनको सन्दर्भमा तीन महिना धनकुटामा जेल जीवन बिताएका अधिकारी संविधानको रक्षाका लागि निर्वाचनमा आएको बताउँछन् ।

समाज रूपान्तरण, युवाको सशक्तीकरण र लोकतान्त्रिक मूल्य–मान्यताको प्रबर्द्धन आफ्नो उद्देश्य रहेको बताउँदै अधिकारीले संविधानको निरन्तरताका लागि आफ्नो उम्मेदवारी रहेको दाबी गरे ।

२०६२/६३ सालको जनआन्दोलनको नेतृत्वदायी भूमिकामा रहेका अधिकारी अहिले देशलाई खत्तम पार्ने प्रयत्न भएको र जनमोर्चाले देश जोगाउने दाबीसमेत गरे । बागलुङका नेता चित्रबहादुर केसीको विरासत जोगाउन आफ्नो उम्मेदवारी रहेको उनले बताए ।