ह्याट्रिकको विरासत जोगाउने कसरत

शक्तिबहादुर बस्नेतका लागि यो निर्वाचन आफ्नो "विरासत जोगाउने" र "एक्लै पनि बलियो छु" भनेर प्रमाणित गर्ने अग्निपरीक्षा हो। अघिल्लो निर्वाचनमा जस्तो कांग्रेसको 'रेडिमेड' मत नहुँदा उनले यसपटक थप कडा संघर्ष गर्नुपर्ने देखिन्छ।

०००

२०२८ वैशाखमा जाजरकोटको कालेगाउँमा जन्मिएका शक्तिबहादुर बस्नेत कुनै बेला सशस्त्र संघर्षको माध्यमबाट नेपाललाई जनवादी गणतन्त्र बनाउने युद्धमा सामेल थिए । अहिले भने चौथोपटक संसद सदस्य बन्ने योजना कार्यान्वयनमा छन् ।

राजनीतिशास्त्रमा स्नातकोत्तर बस्नेत नेकपा एकता केन्द्र (मशाल)बाट राजनीतिमा आएका हुन् । २०४६ सालको जनआन्दोलनमा उनी मशालबाटै सहभागी थिए । २०४८ सालमा एकता केन्द्र (मशाल)को राप्ती क्षेत्रीय समन्वय समिति सदस्य र २०४९ मा जाजरकोट जिल्ला सेक्रेटरी भएका उनी २०५१ देखि नेकपा (माओवादी) को पश्चिम क्षेत्रीय ब्यूरो सदस्यको रूपमा ग्रामीण वर्ग–संघर्षको नेतृत्व गरे ।

२०५५ मा माओवादीको वैकल्पिक केन्द्रीय सदस्य बनेका उनले त्यसको दुई वर्षपछि केन्द्रीय सदस्य र त्यसलगत्तै भेरी–कर्णाली क्षेत्रीय ब्यूरो इञ्चार्जको जिम्मेवारी पाए । २०५९ सालमा पोलिटब्यूरो सदस्य भएपछि बस्नेत भेरी–कर्णाली र थारूवान क्षेत्रीय ब्यूरो इञ्चार्जको भूमिकामा आए । पार्टीको जनमुक्ति सेनाको डिभिजन कमिसार भएर उनले गण्डकी ब्यूरोको पनि नेतृत्व गरे ।

२०७१ मा स्थायी कमिटी सदस्य बनेका उनी आठौं महाधिवेशनबाट उपमहासचिव चुनिए । जाजरकोटबाट कुनै पार्टीको नेतृत्व तहमा पुग्ने पहिलो नेता बनेका बस्नेत २०६४ मा समानुपातिकतर्फबाट पहिलो संविधानसभामा पुगे । २०६८ मा स्वास्थ्य तथा जनसंख्या मन्त्री बन्ने अवसर पाएका उनी २०७० को दोस्रो संविधानसभा निर्वाचनमा प्रत्यक्ष निर्वाचित भएर गृहमन्त्री बने ।

२०७४ को प्रतिनिधिसभा चुनावमा विजयी भएसँगै उनी वन तथा वातावरणमन्त्री भए । २०७९ सालमा तत्कालीन सत्ता गठबन्धनको बलमा पुनः विजयी भएर संसदीय निर्वाचनमा ‘ह्याट्रिक’ गरेका उनलाई अब विरासत जोगाउने चुनौती छ । यसरी उनी जाजरकोटबाट सबैभन्दा धेरै चुनाव जित्ने र मन्त्री बन्ने नेतामा पनि बस्नेत पर्दछन् ।

गत निर्वाचनमा बस्नेतले  ३४ हजार १५१ मत ल्याउँदा निकटम प्रतिद्वन्द्वी एमालेका निरजप्रसाद आचार्यले  २५ हजार १२० मत पाएका थिए । यसपटक एमालेबाट डम्बरबहादुर सिंह र नेपाली कांग्रेसबाट खड्कबहादुर बुढाले उम्मेदवारी दिएका छन् । 

२०७९ सालमा सम्पन्न स्थानीय तह निर्वाचनमा जाजरकोटा ७ पालिकामध्ये कांग्रेस र एमालेले ३/३ प्रमुख जित्दा माओवादीले १ मात्र पालिका प्रमुख जितेको थियो । कांग्रेस र माओवादीले ३/३ उपप्रमुख जित्दा एमालले एकजना पालिका उपप्रमुख जितेको देखिन्छ ।